Oder: Mir Schwoba saget „Wender“

Ja, wandra em Wender isch schee!
M’r dabbt durch da sulzige Schnee,
ond henderher isch m’r soichnass,
ond dees macht Schbass??

Es friert d‘r Bobbes ond d‘ Hend,
es friered de Alde am Grend,
du zittersch ond g‘wärmsch deine Hend an ‘ra Tass‘,
ond dees macht Schbass?

D‘r Karra isch zuagfora mit Reif,
du muasch schärra ond d’Fenger wern steif,
es schneit en dein Angga, saugrass,
ond dees macht Schbass?

S’Trottwar soddsch schibba, streisch Salz aus d’r Schissel
do hagelt dei Nochbor direkt uff da Rüssel,
ha, bei so äbbes griagsch grad doch da Hass,
ond dees macht Schbass?

Do will i‘ ned naus, do will i‘ nix säha,
do ka’s wägga mir d’r ganz Schnee weiterwäha!
Do hock i‘ am Ofa ond glotz naus uff mei‘ Gass,
Ja, dees macht Schbass!!

2008_12_11/w.p.